Il Pianist Colin Vallon, il bassist Patrice Moret ed il battarist Julian Sartorius möbleschan spazis cun lur clings, i s-chaffischan cuntradas, illustreschan sentimaints. Nüanzas finas caracteriseschan lur tocs filigrans, dinamica differenzchada, qua e là escapadas i’l muond da rumuors e caneras, lura darcheu atmosferas chi balantscheschan in equiliber sco mobiles fragils. Ils clings s’alvaintan e sparischan darcheu plan planet giò aint illas profuondezzas, ün s’algordar, ün s’impersögnar, ün s’insömgiar – bler lö, blera libertà. Blera poesia – ed eir blera vigur. Cun mezs frais-chs s’instradeschan ils trais süllas vias e sendas strapatschadas dal jazz tonal per rivar, in maniera persvasiva, a rivas nouvas ed incuntschaintas. Ün evenimaint chi fa güzzar las uraglias! Clavazin: Colin Vallon I Gïun: Patrice Moret I Battaria: Julian Sartorius.