Char public

Nus ans laschain increscher da Vus. E nus ans laschain increscher da sairadas teatralas plain musica, istorgias e bels inscunters. E listess vaina d’avair amo ün pa pazienza fin cha nus ans pudain inscuntrar darcheu. Las portas da La Vouta restan serradas amo quist mais. Ma nus ans allegrain sün ün recumanzamaint plain da cuaidas, vöglias e dalets cun la stagiun nouva da cultura d’utuon 2020.

Nossas e noss collegas dal teater La Cappella a Berna han circumscrit la situaziun odierna cun ün purtret chi tocca sül viv. “Il Cussagl Federal spordsch’a la scena da cultura üna bella jaröbla frais-ch-süjusa. Mo morder laint cun gust nu pudaina.” Occurrenzas da cultura pon bainschi avair lö darcheu, mo i vala amo adüna da mantgnair las reglas da restar sün distanza. Quai fa sen, mo quai es greiv d’aplichar in ün spazi plütöst limità sco a La Vouta. L’atmosfera prüvada da mangiar illa ‘stüva’ e da giodair ün spetacul i’ls vouts nu’s laschan cumbinar guera cun ün concept d’igiena chi metta prüma priorità al mantgnair distanza.

Perquai ans vaina decis, schabain cun ün cour greiv, insembel cun artistas ed artists da spostar l’occurrenza da gün e da tilla programmar d’utuon 2020. Illa situaziun actuala pudessna spordscher lö be a bler massa pacs da Vus in La Vouta – quai chi nu satisfess ni a nus organisaturas ed organisatuors ni als artists partecipats – e plü co facil neir na a Vus, stimà public. Nus As ingrazchain da cour per Voss’incletta e per Vossa pazienzcha.

E’ns allegraina tantüna tant daplü sül cumanzamaint da la stagiun in settember. As reservai fingià uossa las datas dals 18 als 20 settember in Voss’agenda. Là dessa lura dvantar – spranza – allegraivel, combel da culuors e fatschettas e nüanzas – darcheu tuottafat la-voutesc apunta.

A la prosma vouta in La Vouta.

Cordials salüds

Anna Serarda, Gianna Olinda, Joannes Bernard, Anna Tina e Vanja

  • Deutsch
  • Rumantsch
  • de
  • ru