«Ciao Babylon» «Amalia e Giancarlo»

«Ciao Babylon» ans maina a New York pro Dan Kaufmann, ün collecziunader paschiunà da linguas illa dschungla spessa metropolitana, ed accumpogna a Giancarlo Malchiodi da Brooklyn chi fa viadi in Surselva a la retschercha da sia lingua materna persa. Da las 6‘500 linguas existentas murirà – tenor l’UNESCO – la mità fin a la fin da nos tschientiner. Cun mincha lingua chi svanischa va a perder eir ün möd tuottafat agen da verer il muond. «Ciao Babylon» ans rend’attents a quista situaziun alarmanta.
Dürada: 52 minuts
Versiun originala per inglais, spagnöl, rumantsch e tudais-ch svizzer, cun subtitels tudais-chs

«Amalia e Giancarlo» quinta da l’istorgia commoventa d’emigraziun dad Amalia Malchiodi-Cadieli dad 86 ons. Avant 60 ons es viagiada la duonna sursilvana sco chürunza d’uffants cun üna famiglia benestanta i’ls Stadis Units da l‘America. Plü tard s’ha’la domiciliada a New York. Ma sia patria e sia lingua oriunda nun ha’la mai invlidà. Il film accumpogn‘ad ella ed a seis figl Giancarlo sül viadi inavo pro lur ragischs grischunas.
Dürada: 25 minuts
Versiun originala per rumantsch ed inglais, cun subtitels tudais-chs

Producziun: Soap Factory GmbH, Basilea